شسولف ياوطن والبيه صاير بيك
مفضوحه السوالف والصدك ضايع
وامتيه الامان وناس تكره ناس
مختلفه النفوس مزور الطابع
وناس منين اجتنه يقودها الجلاد
تذبح عالهويه تفجر الجامع
علينه تجاوزو ياوطن كلش حيل
وصلت للستر وتشمت السامع
من بيتي انحرم واتهجر بيادين
واطفالي وغراضي تنام بالشارع
ومايرضاها بختك والظمير اطفال
كلّب روسهم شيب الحزن طالع
يابو الخير انشدك وين خيرك راح
شبعان السياسي وكل طفل جايع
النفط تهريب واصل حته لليابان
ومتاني يجيني وهالشهر سابع
ومن تعبي وشتالي مشبع الجيران
بس شوف الضيافه وهالفرق شاسع
انطيهم نفط واليصح والمقسوم
خير هواي عندي وماكلت مانع
وهمه بلا حيه ولا مستحه يجازون
تعبي يفجرون السوك والشارع
تحليل الصور واضح كبال العين
حكي وبس اهوّن ينوكل نصه
مثل خيط الشمس بين حقدها اعداي
واليسكت جريمه يضيّع الفرصه
احشمك ياوطن كوم عله حيلك كوم
قرانك بديهم حرفو نصه
عليك بشيلة امك والبخت والعوز
احلفك خنجرك بصدورهم رصه
لأن عالي بمقامك بالحنان تفيض
رادوها اتساوه العلوه والنصه
لأن عالي بمقامك بالحنان تفيض
رادوها اتساوه العلوه والنصه
ماصدك تطيح ومستحيل يصير
والمثلك وصلها شلون يتوصه
وبيهم لا تأمن وانته تطلب ثار
ويريدون منك ياوطن حصه
هاك السيف شيله وصير ابن شداد
واذا عالو النوب اللسانهم كصه
الأحد سبتمبر 23, 2007 8:20 am
